бактериологиялық қару

(Бактериологическое (биологическое) оружие)

жаппай зақымдаушы қару. Оның әсер етуі адамдарда, жануарлар мен өсімдіктерде жаппай әр түрлі ауру туғызатын микро-организмдер мен уларды пайдалануға негізделген. Б.қ-дың негізі ауру туғызатын микроорганизмдер мен улардан тұрады: вирустар, бактериялар, риккетсиялар, саңырауқұлақтар, ботулизм уы, т.б. Адамдарды зақымдайтын микроорганизмдер: обаның, тырысқақтың, түйнеме, туляремия, бөртпе және іш сүзегінің, пситтакозаның қоздырғыштары, т.б. Малдарды зақымдау үшін түйнеме мен маңқа (сапа) қоздырғыштарымен қатар ірі қара мал мен шошқаның және т.б. аусыл, обаларының вирустары да қолданылуы мүмкін. Өсімдіктерді ауруға ұшырататын бірқатар микроорганизмдер белгілі. Дәнді дақылдарда масақтың қараюы, картоп фитофторозасы, күріш пирикулярнозы, т.б. Адамның бактериялық заттармен тыныс мүшелері, асқазан-ішек жолдары, шырышты қабық-тары арқылы, сондай-ақ осы вирустармен зақымданған таратушылар шаққан кездерде зақымданады. Атмосфераның жерге жақын қабаттарын аэрозольмен зақымдау үшін бактериялық заттар сұйық немесе құрғақ рецептуралар түрінде қолданылады. Сонымен қатар олар зақымданған жәндіктер, кенелер мен кеміргіштер арқылы да тарайды. Ауаның жерге жақын қабатын зақымдау және ауру таратушыларды тарату үшін: жарылу арқылы әсер ететін (ракеталардың биологиялық жарылыс бөліктері, авиациялық бомбалар мен кассеталар, артиллериялық снарядтар, миналар мен фугастар), механикалық жолмен ашылатын (вирус таратқыштар салынған энтомологиялық бомбалар, контейнерлер) биологиялық қару-жарақтар мен аспаптар қолданылады.

Б.қ. қолдану — адамзатқа қарсы жасалатын ең ауыр қылмыс. Ол өзінің зардабы жағынан соғыстың ең қатал да қатыгез құралдарының бірі.